ގުދުރަތީ ވަސީލަތްތައް ހިމާޔަތްކޮށް، ދިރިއުޅުން ދެމެހެއްޓުން: ސީއޯޕީ16 މޭޔަރުންގެ ފޯރަމްގައި ދެމެހެއްޓެނިވި ނޫން ފަތުރުވެރިކަމާ ދެކޮޅަށް

ކޮޕް16 ގެ މޭޔަރުންގެ ފޯރަމްގައި، އަޅުގަނޑުމެންގެ ރައީސް މުޙައްމަދު ބަޝީރު ދެއްވި ތަޤުރީރުގައި، ދިވެހިރާއްޖޭގެ ރަށްތަކަށް ކުރިމަތިވެފައިވާ ނުރައްކާތެރި މައްސަލަތަކަށް އަލިއަޅުއްވާލައްވައި، ދެމެހެއްޓެނިވި އަދި މުޖުތަމަޢަށް އިސްކަންދޭ ހައްލުތަކަކަށް ވަކާލާތު ކުރެއްވިއެވެ. އަޅުގަނޑުމެންގެ ބަޔާނުގައި، ދެފުށް ފެންނަ ހިންގުމަކާއި، ޒިންމާދާރު މާލީ ނިޒާމެއްގެ މުހިންމުކަމާއި، ތިމާވެށި ހިމާޔަތްކުރުމާއި ތަރައްޤީގެ މަސައްކަތްތަކުގައި ލޯކަލް ކައުންސިލްތަކަށް ބާރުވެރިކަން ދިނުމުގެ މުހިންމުކަމުގެ މައްޗަށް ބާރުއެޅުއްވިއެވެ. މީގެ އިތުރުން، ރާއްޖޭގެ ރަށްތައް އިންތިހާއަށް އަގުބޮޑު ލަގްޒަރީ ފަތުރުވެރިކަމަށް ކުއްޔަށް ދޫކުރަމުންދާ ކަންބޮޑުވާންޖެހޭ އޮއިވަރަށް ސަމާލުކަން ގެނައެވެ. ނޫނު އަތޮޅުގެ 72 ރަށުގެ ތެރެއިން 25 ރަށެއް މިހާރުވެސް 100 އަހަރަށް ކުއްޔަށް ދޫކޮށްފައިވާއިރު، މީގެ ސަބަބުން ތިމާވެށްޓަށް ބޮޑެތި ގެއްލުންތަކެއް ދަނީ ލިބެމުންނެވެ. އުދައަރާ ވަގުތުތަކުގައި ރަށްރަށަށް ލިބޭ ގެއްލުން ކުޑަކޮށްދޭ ގުދުރަތީ އައްޑަނައެއް ކަމަށްވާ ކުޅިތަކާއި ފާތައް ފަދަ ނިޒާމުތައް މި މަޝްރޫޢުތަކުގެ ސަބަބުން ދަނީ ހަލާކުވަމުންނެވެ. ކުއްޔަށް ދޫކުރާ ކޮންމެ ރަށަކީ، އާންމުން މަސްވެރިކަން ކުރާ ސަރަހައްދުތަކާއި، ދަނޑުވެރިކަން ކުރާ ބިންތަކާއި، މުޖުތަމަޢުގެ ދިރިއުޅުމާ ގުޅިފައިވާ ފަރުތަކަށް އޮތް ހުރަހެއްކަން އޭނާ ފާހަގަކުރެއްވިއެވެ.

މިހާރުވެސް އަޅުގަނޑުމެން ދަނީ، އިތުރަށް ރަށްތައް ކުއްޔަށް ދޫކުރުން ހުއްޓުވުމަށާއި، ވަކިން ހާއްސަކޮށް ރަށުގެ ގުދުރަތީ ނިޒާމަށާއި އާންމުންގެ ދިރިއުޅުމަށް މުހިންމު ކުޅިތައް ހިމެނޭ ރަށްތައް ހިމާޔަތްކުރުމަށް މަރުކަޒީ ސަރުކާރާ ދެކޮޅަށް ޝަރުޢީ މައިދާނުގައި މަސައްކަތް ކުރަމުންނެވެ.

ރާއްޖެއަށް ދަނީ ތިމާވެށީގެ ބޮޑެތި ގޮންޖެހުންތަކެއް ކުރިމަތިވަމުންނެވެ. އޭގެ ތެރޭގައި ރަށް ގިރުމާއި، ގޮނޑުދޮށްތައް ހަލާކުވުމާއި، ބައިނަލްއަޤުވާމީ އެހީގައި ހިންގާ ބިން ހިއްކުމުގެ ބޮޑެތި މަޝްރޫޢުތައް ހިމެނެއެވެ. ކުޅިތައް ނެތިދިއުމާއި، ފެން ތަޣައްޔަރުވުމާއި، ބިން ހަލާކުވުމުގެ ސަބަބުން ރަށްރަށުގެ މުޖުތަމަޢުތައް އޮތީ ބޮޑު ނުރައްކަލެއްގެ ތެރޭގައެވެ. އަދި ދަނޑުވެރިކަން އެކަށީގެންވާ މިންވަރަށް ނުކުރެވޭތީ އިމްޕޯޓަށް ބަރޯސާވާންޖެހުމަކީ ގައުމުގެ ނާޒުކުކަން އިތުރުވާ ކަމެއްކަން ފާހަގަކުރެއްވިއެވެ. މީގެ އިތުރުން، ދުނިޔޭގެ އެކި ފަންޑުތަކުން ލިބޭ ފައިސާ، ތިމާވެށްޓާއި މުޖުތަމަޢަށް ފައިދާހުރި ކަންކަމުގެ ބަދަލުގައި، މަގު ހެދުން ފަދަ ދެމެހެއްޓެނިވި ނޫން އުމްރާނީ މަޝްރޫޢުތަކަށް ހޭދަކުރާތީ އެކަމުގެ ކަންބޮޑުވުން ފާޅުކުރެއްވިއެވެ.

ގުޅިގެން މަސައްކަތްކުރާ، ދެފުށް ފެންނަ ހިންގުމަކަށް ގޮވާލުން

މަރުކަޒީ ހިންގުމުގެ ސަބަބުން ލޯކަލް ކައުންސިލްތަކުގެ ބާރު ހަނިވެ، ކުޅިތައް އާލާކުރުމާއި ގޮނޑުދޮށް ބެލެހެއްޓުން ފަދަ މުހިންމު މަސައްކަތްތަކަށް ހުރަސްއެޅޭކަން އަޅުގަނޑުމެން ބަޔާންކުރީމެވެ. އޭނާ ވަކާލާތު ކުރެއްވީ، ޤާނޫނީ އޮނިގަނޑުގެ ތެރެއިން ކައުންސިލްތަކަށް ބާރުދީ، ބައިނަލްއަޤުވާމީ އެހީތައް ދިގު މުއްދަތުގެ ދެމެހެއްޓެނިވި ހައްލުތަކަށް އަމާޒުކުރެވޭނެ، ލާމަރުކަޒީ އަދި ގުޅިގެން މަސައްކަތްކުރާ ނިޒާމަކަށެވެ.

ކުރިއަށް ދިއުމަށްޓަކައި އަޅުގަނޑުމެން ގޮވާލަނީ:

• ދެފުށް ފެންނަ ހިންގުމާއި ޒިންމާދާރުވުން: ވަސީލަތްތައް ބޭނުންކުރުމުގައި ޒިންމާދާރުވުމާއި، ނިންމުންތައް ނިންމުމުގައި މުޖުތަމަޢުގެ ލާބައަށް އިސްކަންދިނުން ކަށަވަރުކުރުން.

  • ގަދީމީ އިލްމާއި ޒަމާނީ ހުނަރު އެއްކުރުން: ސައިންސުގެ އައު ހޯދުންތަކާއެކު، މުޖުތަމަޢުގެ ތަޖުރިބާ އާއި ދެނެގަތުންތަކުގެ ބޭނުން ހިފުން.

  • ,

    ލޯކަލް ހައްލުތަކަށް ދުނިޔޭގެ މާލީ އެހީތެރިކަން: ކުރު މުއްދަތުގެ ތަރައްޤީގެ ބަދަލުގައި، މުޖުތަމައު އިސްކޮށްގެން ކުރިއަށްގެންދާ ދެމެހެއްޓެނިވި މަސައްކަތްތަކަށް އިސްކަންދޭ މާލީ އޮނިގަނޑުތަކެއް ގާއިމުކުރުން.

  ދެމެހެއްޓެނިވި މުސްތަގުބަލަކަށް އޮތް ތަސައްވަރު

  ތިމާވެށީގެ ނުރައްކާތަކަށް ހައްލު ހޯދުމަށްޓަކައި، ދެފުށް ފެންނަ ސިޔާސަތުތަކާއި، ދެމެހެއްޓެނިވި އުސޫލުތަކާއި، އަދި ގުޅިގެން މަސައްކަތްކުރާނެ ހައްލުތަކަށް އެއްބާރުލުން ދިނުމަށް ބައިނަލްއަގުވާމީ މުޖުތަމައަށް ގޮވާލަމެވެ. ލޯކަލް ކައުންސިލްތަކަށް ބާރުވެރިކަން ދީ، އިހުގެ އާދަކާދަތަކަށް އިހުތިރާމްކޮށްގެން، ތަރައްޤީއާއި ތިމާވެށި ހިމާޔަތްކުރުން އެކުގައި ކުރިއަށްދާނެ މުސްތަގުބަލެއް އޭނާ ތަސައްވަރު ކުރައްވައެވެ. މިއީ ރާއްޖޭގެ ތިމާވެށީގެ ނިޒާމުތަކާއި މުޖުތަމައުތަކުގެ ލާބައާއި މަންފާ ކަށަވަރުކޮށްދޭނެ ކަމެކެވެ.