ނ. އަތޮޅު ކައުންސިލުން ކްލައިމެޓް ވަލްނަރަބަލް ފޯރަމްއާއެކު މޫސުމީ ކުރިއެރުމުގެ ޕްލޭނިންގ އަށް މަސައްކަތްކުރަން ފަށައިފި

ދިވެހިރާއްޖޭގެ ރަށްތަކ ފަދަ ކުދި ޖަޒީރާ ރަށްތަކަކީ މޫސުމަށް އަންނަ ބަދަލުތަކުގެ ނުރައްކާ އިންތިހާއަށް ބޮޑުވެފައިވާ ތަންތަނެވެ. މިކަމަށް އަވަސް ފިޔަވަޅުތަކެއް އެޅުމުގެ މުހިންމުކަން ދެނެގަނެ، ނޫނު އަތޮޅު ކައުންސިލުން ދަނީ މި ގޮންޖެހުންތަކުން އަރައިގަނެ، މުޖުތަމައުގެ ދެމެހެއްޓެނިވި މުސްތަގުބަލެއް ކަށަވަރުކުރުމަށްޓަކައި އިސްނަގައިގެން މަސައްކަތް ކުރަމުންނެވެ. މި މަސައްކަތްތަކުގެ ތެރެއިން ދާދިފަހުން ކޮލަމްބޯގައި ހުންނަ ކްލައިމެޓް ވުލްނަރަބަލް ފޯރަމް (ސީ.ވީ.އެފް) ގެ ރީޖަނަލް އޮފީހުގައި އެ ފޯރަމާއެކު ބޭއްވި ބައްދަލުވުމަކީ، ތިމާވެށީގެ ނުރައްކާތަކާ ކުރިމަތިލައި، އަތޮޅުގެ ތަރައްގީއާއި ކުރިއެރުން ކަށަވަރުކުރުމަށް ކައުންސިލުން ކުރާ މަސައްކަތުގައި އެޅުނު މުހިންމު ފިޔަވަޅެކެވެ.

ކްލައިމެޓް ޕްރޮސްޕެރިޓީ ޕްލޭން (ސީ.ޕީ.ޕީ) ކުރިއެރުވުން

ކައުންސިލުން ސީ.ވީ.އެފް އާއެކު ކުރިއަށްގެންދިޔަ މަޝްވަރާތަކުގެ މައިގަނޑު އަމާޒަކީ ކްލައިމެޓް ޕްރޮސްޕެރިޓީ ޕްލޭން (ސީ.ޕީ.ޕީ) ތަންފީޒުކުރުމެވެ. މިއީ ހަމައެކަނި މޫސުމީ ބަދަލުތަކުން ކުރިމަތިވާ ނުރައްކާތަކަށް ހައްލު ހޯދުމުގެ އިތުރުން، ދެމެހެއްޓެނިވި އިގްތިސާދީ އަދި އިޖުތިމާއީ ކުރިއެރުމަށް ހުރި ފުރުސަތުތަކުގެ ބޭނުން ހިފުމަށް އެކުލަވާލާފައިވާ ފުޅާ ދާއިރާއެއްގެ އޮނިގަނޑެކެވެ. މި ބައްދަލުވުމުގައި ކަނޑައެޅުނު އިސްކަންދޭ ކަންތައްތަކުގެ ތެރޭގައި ހިމެނެނީ:

• އުމްރާނީ ވަސީލަތްތައް ބަދަލުކުރުން: މޫސުމީ ލޮޅުންތަކަށް ކެތްކުރެވޭނެ ފަދަ ގޮތަކަށް މުހިންމު އުމްރާނީ ވަސީލަތްތައް ބަދަލުކުރުމާއި، ހިދުމަތްތައް މެދުނުކެނޑި ފޯރުކޮށްދިނުމުގެ އިތުރުން، ރަށުގެ އިގްތިސާދާއި ރައްކާތެރި ބޯހިޔާވަހިކަމަށް މަގުފަހިކުރުން.

  • އެގްރޯ ފޮރެސްޓްރީ: ބިމުގެ ބޭނުން ހިފުމުގައި އާ އުސޫލުތައް ތައާރަފުކުރުމާއި، ދަނޑުވެރިކަމާއި ގަސް އިންދުމުގެ އިތުރުން، ކަނޑޫފަލާއި ފަރުތައް ހިމާޔަތްކޮށް ތިމާވެށި ބެލެހެއްޓުމަށް ހިތްވަރުދިނުން.

  • މުނިސިޕަލް ހިދުމަތްތަކުގެ ހައްލުތައް: މުނިސިޕަލް ހިދުމަތްތައް ފޯރުކޮށްދިނުމުގައި ލޮޖިސްޓިކް ހައްލުތައް ހަރުދަނާކުރުމަށް މޮބައިލް ޓެކްނޮލޮޖީ ބޭނުންކުރުމާއި، ހަކަތައިގެ ނިޒާމު ބަދަލުކޮށް، ލޯކަލް ގަވަރނަންސް އަދި ދުވަހުން ދުވަހަށް ކުރާ މަސައްކަތްތައް ހަރުދަނާކުރުން.

  މި މަޝްވަރާތަކުގެ މުހިންމު ބައެއްގެ ގޮތުގައި ސަރަހައްދީ އަދި ގައުމީ ފެންވަރުގައި އެއްބާރުލުން ދިނުމުގެ އަގު ފާހަގަކުރެވުނެވެ. ކައުންސިލާއި ސީ.ވީ.އެފް އިން ވަނީ ދިވެހި ސަރުކާރާއި އޭޝިއާ ޕެސިފިކް ސަރަހައްދުގެ ގައުމުތަކާއި ކަމާބެހޭ ފަރާތްތަކާއެކު ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް އަލިއަޅުވާލާފައެވެ.

  ކައުންސިލްގެ އެންމެ މުހިންމު އެއް އަމާޒަކީ ނޫނު އަތޮޅުގެ ރައްޔިތުން ބާރުވެރިކުރުވުމެވެ. މީގެ ތެރޭގައި ބިމުގެ ހައްގުތަކާއި، ބޯހިޔާވަހިކަމާއި، އިގްތިސާދީ ފުރުސަތުތަކާއި، މޫސުމީ ބަދަލުތަކަށް ހޭލުންތެރިކުރުވުމާއި، ފަންނީ ތަމްރީނުތަކުގެ އިތުރުން ގޮތް ނިންމުމުގެ މަރުހަލާތަކުގައި ބައިވެރިވުމުގެ ފުރުސަތު ފަހިކޮށްދިނުން ހިމެނެއެވެ. މުޖުތަމައު އިސްވެ އޮވެގެން ކުރިއަށްދާ މިފަދަ އުސޫލެއްގެ ސަބަބުން، ނޫނު އަތޮޅުގެ ރައްޔިތުންނަކީ އަމިއްލަ މުސްތަގުބަލު ބައްޓަންކުރުމުގައި ހަރަކާތްތެރި ދައުރެއް އަދާކުރާ ބަޔަކަށް ހެދުމަށް އަމާޒުކުރެވެއެވެ.

  ,

  ސީ.ވީ.އެފް އާއެކު ކުރެވޭ މި މަސައްކަތަކީ ނޫނު އަތޮޅުގެ ރަށްތަކުގެ ތަރައްޤީގެ ރޭވުންތަކާއި އަމަލުތައް ދުނިޔޭގެ އެންމެ ރަނގަޅު އުސޫލުތަކާ އެއްގޮތަށް ބައްޓަންކުރުމަށް ލިބޭ ހާއްސަ ފުރުސަތެކެވެ. ނާޒުކު ގައުމުތަކަށް އެހީތެރިކަން ފޯރުކޮށްދިނުމުގައި ސީ.ވީ.އެފް އަށް ލިބިފައިވާ ފުޅާ ތަޖުރިބާއަކީ ނޫނު އަތޮޅުގެ "ކްލައިމެޓް ޕްރޮސްޕެރިޓީ ޕްލޭން" ނުވަތަ މޫސުމީ ތަނަވަސްކަމުގެ މަޝްރޫޢުގައި ކާމިޔާބު އިސްތިރާތީޖީތައް ހިމެނުމަށް ލިބޭ އަގުހުރި ވަސީލަތެކެވެ. މީގެ އިތުރުން، މިފަދަ ބައިނަލްއަގުވާމީ ގުޅުންތަކުގެ ސަބަބުން ދުނިޔޭގެ ފެންވަރުގައި ނޫނު އަތޮޅަށް އޮންނަ ސަމާލުކަން އިތުރުވެ، ބައިނަލްއަގުވާމީ އެހީތެރިކަމާއި މާލީ އެހީ ހޯދުމަށް ކުރާ މަސައްކަތްތަކަށް އިތުރު ބާރެއް ލިބިގެންދެއެވެ.

  ނޫނު އަތޮޅުން އަންނަނީ އަޅުގަނޑުމެންގެ މުޖުތަމައާއި ގުދުރަތީ މާހައުލު ރައްކާތެރިކުރުމަށް ގިނަގުނަ މަސައްކަތްތަކެއް ކުރަމުންނެވެ. އެ އަތޮޅުން ގާއިމުކޮށްފައިވާ އިސްތިރާތީޖީ ގުޅުންތަކާއި ދެމެހެއްޓެނިވި ތަރައްޤީއަށް ބަހައްޓާ ހާއްސަ ސަމާލުކަމަކީ، މިފަދަ ގޮންޖެހުންތަކާ ކުރިމަތިލާންޖެހިފައިވާ އެހެން އަތޮޅުތަކާއި ކުދި ޖަޒީރާ ގައުމުތަކަށް ނަމޫނާއެކެވެ. މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނުރައްކާތަކަކީ ބޮޑެތި ގޮންޖެހުންތަކެއް ނަމަވެސް، ގުޅިގެން ކުރެވޭ މަސައްކަތާއި ކުރިއެރުމަށް އޮތް ސާބިތު އަޒުމާއެކު، އައު އީޖާދީ ހައްލުތަކުން އެކަންކަމާ ކުރިމަތިލެވިދާނެކަން ކައުންސިލްގެ މަސައްކަތުން ސާބިތުކޮށްދެއެވެ.