ނ. އަތޮޅު ކައުންސިލުން 37 ވަނަ ޤައުމީ ޤުރުއާން މުބާރާތުގައި ވާދަކުރާ ދަރިވަރުންނަށް އެހީތެރިކަން ފޯރުކޮށްދޭ

މާލޭގައި ބޭއްވޭ 37 ވަނަ ގައުމީ ގުރުއާން މުބާރާތުގައި ނޫނު އަތޮޅުގެ 18 ދަރިވަރުން ބައިވެރިވާކަން އިއުލާން ކުރަނީ ފަޚުރުވެރިކަމާއެކުގައެވެ. ގުރުއާން އުނގަންނައިދިނުމަށް އަޅުގަނޑުމެން ދޭ އަހައްމިއްޔަތުގެ ދަށުން، ނޫނު އަތޮޅު ކައުންސިލުން ދަނީ މުބާރާތުގައި ބައިވެރިވާ ހުރިހާ ދަރިވަރުންނަށް އެހީތެރިކަން ފޯރުކޮށްދެމުންނެވެ.

މި މުހިންމު ދަތުރުގައި ދަރިވަރުންނަށް އެހީތެރިވުމުގެ ގޮތުން، މުބާރާތަށް މާލެދާ ކޮންމެ ދަރިވަރަކަށް 3،000 ރުފިޔާގެ މާލީ އެހީތެރިކަމެއް ފޯރުކޮށްދިނުމަށް ނޫނު އަތޮޅު ކައުންސިލުން ވަނީ ހަމަޖައްސާފައެވެ. މިއީ ގުރުއާން އުނގަންނައިދިނުން ކުރިއެރުވުމަށާއި، މާލީ ދަތިކަމެއް ނެތި ދަރިވަރުންނަށް މުބާރާތުގައި ބައިވެރިވުމުގެ ފުރުސަތު މަގުފަހިކޮށްދިނުމަށް އަޅުގަނޑުމެން ކުރާ މަސައްކަތުގެ ބައެކެވެ.

މީގެ އިތުރުން، ދަރިވަރުންނާއި ބެލެނިވެރިންނަށް ޚާއްސަ ބައްދަލުވުމެއް ބޭއްވުމަށް ވެސް ވަނީ ހަމަޖެހިފައެވެ. މި ބައްދަލުވުމަކީ ދަރިވަރުން ހޯދި ކާމިޔާބީ ފާހަގަކުރުމަށާއި، ގައުމީ ފެންވަރުގައި ވާދަކުރުމަށް ތައްޔާރުވަމުންދާއިރު އެކުދިންނަށް ހިތްވަރު ދިނުމަށް ބާއްވާ ބައްދަލުވުމެކެވެ. މި ބައްދަލުވުން ބާއްވާ ތަނާއި، ތާރީޚު އަދި ގަޑި ވަރަށް އަވަހަށް އިއުލާން ކުރެވޭނެއެވެ.

ކަންކަން އޮމާންކަމާއެކު ވިލަރެސްކުރުމަށްޓަކައި، ފޯކަލް ޕޮއިންޓެއްގެ ގޮތުގައި ކައުންސިލް އޮފިސަރު މަރިޔަމް ސައީދާ ވަނީ ހަމަޖައްސާފައެވެ. އަދި މުބާރާތާއި ދަރިވަރުންގެ ކަންކަން ބަލަހައްޓަވާނީ އެޑިއުކޭޝަން ކައުންސިލްގެ ޗެއާމަން މުހައްމަދު އަދުނާން އެވެ.

އަތޮޅުގެ ޒުވާނުންގެ މެދުގައި ގުރުއާން އުނގަންނައިދިނުމާއި ރޫހާނީ ތަރައްގީ ކުރިއެރުވުމަށް ކުރާ މަސައްކަތުގެ ދަށުން، ކޮންމެ އަހަރަކު ވެސް ނޫނު އަތޮޅު ގުރުއާން ފެސްޓިވަލް އަޅުގަނޑުމެން އަންނަނީ ފަޚުރުވެރިކަމާއެކު އިންތިޒާމު ކުރަމުންނެވެ.

މި ފެސްޓިވަލްގެ 2025 ވަނަ އަހަރުގެ އެޑިޝަން ބޭއްވުނީ އޮގަސްޓް 21 އިން 23 އަށް ނޫނު ވެލިދޫގައެވެ. މި ފެސްޓިވަލްގައި އަތޮޅުގެ ހުރިހާ ސްކޫލަކުން ޖުމްލަ 181 ދަރިވަރުން ބައިވެރިވިއެވެ. ދަރިވަރުން ވާދަކުރީ މައިގަނޑު ދެ ގިންތިއަކުންނެވެ. އެއީ ބަލައިގެން ކިޔެވުމުގެ ގިންތިއާއި ނުބަލައި ކިޔެވުމުގެ ގިންތިއެވެ. "ނޫނު އަތޮޅު ގުރުއާން ފެސްޓިވަލްގެ ގަވާއިދު 2025" ގެ ދަށުން ކުރިއަށް ގެންދިޔަ މި ހަރަކާތުގެ މަގުސަދަކީ ކީރިތި ގުރުއާނަށް ލޯބި ޖެއްސުމާއި، ތަޖުވީދުގެ މަގުން ކިޔެވުމާއި ހިތުދަސްކުރުމަށް ހިތްވަރުދީ، ބައިނަލްއަގުވާމީ ފެންވަރުގައި ރާއްޖެ ތަމްސީލުކުރެވޭނެ ގާރީންނާއި ހާފިޒުންގެ އާ ޖީލެއް ބިނާކުރުމެވެ.

ކުރިން "އަތޮޅު ގުރުއާން މުބާރާތް" ގެ ނަމުގައި ބާއްވަމުން އައި މި ހަރަކާތް، 2024 ވަނަ އަހަރު "ފެސްޓިވަލް" އެއްގެ ގޮތަށް ބަދަލުކުރެވުނީ މީގެ ތައުލީމީ އަދި ސަގާފީ މުހިންމުކަން އިތުރަށް ފުޅާކުރުމަށެވެ. ބައިވެރިވި ހުރިހާ ދަރިވަރުންނަށް ހަނދާނީ ލިޔުން ދެވުނުއިރު، ވަނަވަނައަށް ދިޔަ ދަރިވަރުންނަށް ޓްރޮފީއާއި، ސެޓްފިކެޓް އަދި އިނާމު ދެވުނެވެ. މީގެ އިތުރުން ކޮންމެ ގިންތިއަކުން މުޅި މުބާރާތުން އެއްވަނަ ހޯދި ދަރިވަރުންނަށް ފައިސާގެ އިނާމު ވެސް ދެވުނެވެ.

ކީރިތި ގުރުއާނަށް ލޯބިޖެއްސުމާއި، ގާރީންނާއި ހާފިޒުންގެ އާ ޖީލެއް ބިނާކުރުމަށް އަޅުގަނޑުމެން ކުރާ މަސައްކަތުގައި، ގައުމީ މުބާރާތްތަކުގައި ބައިވެރިވާ ދަރިވަރުންނަށް އެހީތެރިވުމަކީ އެޅޭ މުހިންމު ފިޔަވަޅެއް ކަމުގައި އަޅުގަނޑުމެން ގަބޫލުކުރަމެވެ. މުބާރާތުގެ ހުރިހާ ބައިވެރިންނަށް ކާމިޔާބީއަށް އެދެމެވެ.