ލާމަރުކަޒީ ޤާނޫނަށް ސަރުކާރުން ހުށަހަޅާފައިވާ އިސްލާހުތައް އަނބުރާ ގެންދިއުމަށް ކައުންސިލުން ގޮވާލައިފި

ލާމަރުކަޒީ ޤާނޫނަށް ސަރުކާރުން ހުށަހަޅާފައިވާ އިޞްލާޙުތަކުގެ ސަބަބުން، ލޯކަލް ކައުންސިލްތަކުން ރައްޔިތުންނަށް ފޯރުކޮށްދޭ ޚިދުމަތްތަކުގެ މެދުނުކެނޑި ކުރިއަށްދިއުމަށާއި ޚިދުމަތުގެ ފެންވަރަށް ނޭދެވޭ އަސަރުކުރާނެތީ، އެ އިޞްލާޙުތައް އަނބުރާ ގެންދިއުމަށް މި ކައުންސިލުން ގޮވާލަމެވެ.

28 ޖުލައި 2025 ގައި ރައްޔިތުންގެ މަޖިލީހަށް ހުށަހަޅައި، މިހާރު މަޖިލީހުގެ ލާމަރުކަޒީ ކޮމިޓީން ދިރާސާކުރަމުންދާ ބިލް ނަންބަރު B-18/20/2025 ގެ ސަބަބުން، ލާމަރުކަޒީ ޤާނޫނުގެ ދަށުން ކައުންސިލްތަކުން ރައްޔިތުންނަށް ފޯރުކޮށްދެމުންދާ ޚިދުމަތްތަކަށް ބޮޑެތި ހުރަސްތަކެއް އެޅުމުގެ ނުރައްކާ އެބައޮތެވެ. މި ބިލް ފާސްވެ ތަޞްދީޤުވެއްޖެނަމަ، އޭގެ ނަތީޖާއަކަށް ވާނީ އަންނަނިވި ކަންކަމެވެ:

• ލޯކަލް އޮތޯރިޓީ ކުންފުނިތަކަށް 10 މިލިއަން ރުފިޔާއަށްވުރެ އަގުބޮޑު މަޝްރޫޢުތައް ނުހިންގޭ ގޮތަށް ކަނޑައެޅުމަކީ، ރަށާއި، އަތޮޅާއި، ސިޓީ ފެންވަރުގައި ރައްޔިތުންގެ މަންފާއަށާއި ޚިދުމަތްތައް ފޯރުކޮށްދިނުމަށް ކައުންސިލްތަކުގެ ކުންފުނިތަކުން މިހާރު ހިންގަމުންދާ ހުރިހާ މަސައްކަތްތަކެއް ހުއްޓުމަކަށް އަންނާނެ ކަމެކެވެ. ކައުންސިލްތަކުގެ މާލީ ޙާލަތު މިހާރު ހުރި ގޮތުން، ލޯކަލް އޮތޯރިޓީ ކުންފުނިތަކުގެ މަޝްރޫޢުތައް 10 މިލިއަން ރުފިޔާއަށްވުރެ ކުޑަވުމަކީ ނާދިރު ކަމެކެވެ.

• ކުލި ދެއްކުމަކާ ނުލައި ސަރުކާރަށް އާންމު ބިންތައް ބޭނުންކުރެވޭ ގޮތަށް އޮތް މާއްދާގެ ސަބަބުން، ކައުންސިލްތަކަށް އާމްދަނީ ހޯދުމަށް އޮތް ފުރުޞަތު ހަނިވެ، ރަށުގެ ރައްޔިތުންގެ ބައިވެރިވުމެއް ނެތި ސަރުކާރުން ބިންތައް ދޫކުރުމުގެ ބާރު ލިބިގެންދެއެވެ.

• ކައުންސިލްތަކަށް މުވައްޒަފުން ނެގުމަށް 365 ދުވަހުގެ ކުރިން ނޯޓިސް ދޭންޖެހޭ ގޮތަށް ހަމަޖެއްސުމާއި، ރައްޔިތުންގެ މަންފާއަށް ޤުދުރަތީ ވަސީލަތްތައް ބޭނުންކުރުން ހަނިކުރުމުގެ ސަބަބުން، ރައްޔިތުންގެ ބައިވެރިވުމާއެކު އެކުލަވާލާފައިވާ ތަރައްޤީގެ ޕްލޭންތައް ތަންފީޒުކުރުމަށް ހުރަސް އެޅި، ޤާނޫނީ ގޮތުން ކައުންސިލްތަކުން އަދާކުރަންޖެހޭ މަސްއޫލިއްޔަތުތަކަށް ހުރަސް އެޅިގެންދެއެވެ.

އިންތިޚާބުތަކާ ދިމާކޮށް އިންތިޚާބީ މަޤާމުތަކުގައި ތިއްބަވާ ބޭފުޅުން ނުފޫޒު ފޯރުވުން ހުއްޓުވުމަށް ބައެއް ޤައުމުތަކުގައި ދައުލަތުގެ ވަސީލަތްތައް ބޭނުންކުރުން ހަނިކުރި ނަމަވެސް، މި ބިލުގައި ހުށަހަޅާފައިވާ ހަނިކުރުންތަކަކީ އާދަޔާ ޚިލާފަށް ދިގު މުއްދަތަކަށް އަދި ހަމައެކަނި ލޯކަލް ކައުންސިލްތަކުގެ ޚިދުމަތްތަކަށް އަމާޒުކޮށްފައިވާ ކަންކަމެވެ. މަރުކަޒީ ސަރުކާރަށް މިފަދަ ހުރަސްތަކެއް ނެތި، ހަމައެކަނި ކައުންސިލްތަކަށް މިފަދަ ހުރަސްތައް ކުރިމަތިކުރުވުމަކީ، ސަރުކާރުގެ މާލީ ބާރާއި އިދާރީ ނުފޫޒު ބޭނުންކޮށްގެން އިންތިޚާބުތަކަށް ނުފޫޒު ފޯރުވުމަށް މަގުފަހިވާނެ ކަމެކެވެ.

މި ބިލް މިހާރު އޮތް ގޮތުން، ރައްޔިތުންނަށް ކައުންސިލުން ދޭންޖެހޭ ޚިދުމަތްތަކަށް ހުރަސް އެޅި، ރައްޔިތުންގެ ބައިވެރިވުމާއެކު ހަދާފައިވާ ތަރައްޤީގެ ޕްލޭންތައް ހުއްޓުމަކަށް އައިސް، ރަށާއި، އަތޮޅާއި، ސިޓީގެ ވަސީލަތްތައް ރައްޔިތުންގެ ލާބައަށް ބޭނުންކުރުން ހަނިވެގެންދާނެއެވެ. އަދި ދައުލަތުގެ ފައިސާ ބޭނުންކޮށްގެން ކައުންސިލް އިންތިޚާބުތަކަށް ސަރުކާރުން ނުފޫޒު ފޯރުވުމަށް ފުރުޞަތު ލިބި، އިންތިޚާބުގެ މިނިވަންކަމާއި އިންޞާފުވެރިކަން ގެއްލިގެންދާނެއެވެ.

ވީމާ، މި ބިލް އަނބުރާ ގެންދިއުމަށް ސަރުކާރަށް ގޮވާލަމެވެ.