ނ. އަތޮޅު ކައުންސިލާއެކު 6 ރަށެއް ވަނީ ވަންގަވް ޕްލެޓްފޯމާ ގުޅިފައި

ނޫނު އަތޮޅުގެ ޑިޖިޓަލް ޓްރާންސްފޯމޭޝަން ކުރިއެރުވުމަށްޓަކައި، އެ އަތޮޅުގެ ހަ ރަށެއްގެ ކައުންސިލުން (މަނަދޫ، ކުޑަފަރި، މާޅެންދޫ، ކެނދިކުޅުދޫ، ލަންދޫ އަދި މާފަރު) އަތޮޅު ކައުންސިލާ ގުޅިގެން ވަންގަވް (OneGov) ޕްލެޓްފޯމް ބޭނުންކުރަން ފެށުމަށް ތާރީޚީ އެއްބަސްވުމެއްގައި ސޮއިކޮށްފިއެވެ.

މި ރަސްމީ އެއްބަސްވުންތަކުގައި ސޮއިކުރުމަކީ ލޯކަލް ގަވަރނަންސް ހަރުދަނާކުރުމަށާއި ނޫނު އަތޮޅުގެ ރައްޔިތުންނަށް ފޯރުކޮށްދޭ ޚިދުމަތްތައް ރަނގަޅުކުރުމަށް އެޅުނު މުހިންމު ފިޔަވަޅެކެވެ. ވަންގަވް ޕްލެޓްފޯމާ ގުޅުމުން، މި ކައުންސިލްތަކުން އެއް ވިއުގައެއްގެ ތެރެއިން ޑިޖިޓަލް ނިޒާމެއް ބޭނުންކުރަން ފަށާނެއެވެ. މީގެ ސަބަބުން މަސައްކަތުގެ ހަލުވިމިނާއި ދެފުށް ފެންނަ މިންވަރު އިތުރުވެ، އާންމު ޚިދުމަތްތައް ރައްޔިތުންނަށް ފަސޭހައިން ލިބޭނެ މަގު ފަހިވެގެންދާނެއެވެ.

މި ބަދަލާއެކު، ނޫނު އަތޮޅުގެ ރަށްތަކުގެ ރައްޔިތުން ކައުންސިލްތަކުން ހޯދާ ޚިދުމަތްތަކަށް ބޮޑު ލުޔެއް ލިބިގެންދާނެއެވެ. ހުއްދަތަކަށް އެދުމާއި، ލިޔެކިޔުންތައް ހޯދުމާއި، އަދި އާންމު މައުލޫމާތު ހޯދުން ފަދަ އިދާރީ ކަންކަން މިހާރަށްވުރެ އަވަސް، ދެފުށް ފެންނަ، އަދި ފަސޭހަވެގެންދާނެއެވެ. ކައުންސިލްތަކުން ދޭ މުނިސިޕަލް އަދި އާންމު ޚިދުމަތްތައް އިނގިލިކުރިއާ ހަމައަށް ގެނެސްދޭ، ބޭނުންކުރަން ފަސޭހަ މި ޕްލެޓްފޯމުގެ ސަބަބުން ރައްޔިތުންގެ ވަގުތާއި މަސައްކަތް ސަލާމަތްވެ، ލޯކަލް ގަވަރނަންސް ނިޒާމަށް އޮންނަ އިތުބާރު ބޮޑުވެގެންދާނެއެވެ.

މި ބަދަލުގެ ފައިދާ ހަމައެކަނި އިދާރީ ލުޔަކުން ނުނިމެއެވެ. މިއީ ނޫނު އަތޮޅުގެ ރައްޔިތުންގެ ދިރިއުޅުމުގެ ފެންވަރަށްވެސް އަންނާނެ ހެޔޮ ބަދަލެކެވެ. ޚިދުމަތްތައް ހޯދުމުގައި ދިމާވާ ދަތިތައް ނެތިގޮސް، އަވަސްކަމާއެކު ޚިދުމަތް ލިބެން ފެށުމުން ދިރިއުޅުމުގެ ދުވަހީ ކަންކަމަށް ބޮޑު ފަސޭހައެއް ލިބޭނެއެވެ. ކުރިން ގިނަ ވަގުތާއި ބުރަ މަސައްކަތުން ހޯދި ޚިދުމަތްތައް މިހާރު އިތުބާރާއެކު އަވަހަށް ނިންމާލެވޭނެތީ، ރައްޔިތުންނަށް އެމީހުންގެ ވަގުތާއި ހަކަތަ އަމިއްލަ، އިގްތިސާދީ ނުވަތަ އިޖުތިމާއީ ކަންކަމުގައި ހޭދަކުރުމުގެ ފުރުސަތު ލިބޭނެއެވެ. މި ނިޒާމުގެ ސަބަބުން ރައްޔިތުންނާއި ކައުންސިލްތަކާ ދެމެދު އޮންނަ ގުޅުން ބަދަހިވެ، މުޅި އަތޮޅުގައި އެކުވެރިކަމާއި އިތުބާރު އާލާވާނެއެވެ.

ވަންގަވް ޕްލެޓްފޯމަކީ އިދާރީ މަސައްކަތްތައް ޒަމާނީކޮށް، ކައުންސިލްތަކާއި ރައްޔިތުންނާ ދެމެދު ހުރި ހުރަސްތައް ނައްތާލުމަށް ފަރުމާކޮށްފައިވާ ނިޒާމެކެވެ. ބޭނުންކުރަން ފަސޭހަ މި ޕްލެޓްފޯމުގެ ސަބަބުން ހުރިހާ ރައްޔިތުންނަށްވެސް ހަމަހަމަކަމާއެކު ޚިދުމަތްތައް ލިބިގެންދާނެއެވެ. މި މަޝްރޫއުގެ ސަބަބުން ނޫނު އަތޮޅުގެ ރަށްތަކުގެ ރައްޔިތުން ބާރުވެރިވެ، ކަންކަން ހާމަކަން ބޮޑު ގޮތެއްގައި ހިނގައި، މުާމަލާތްތައް ކުރުމުގައި ބޮޑު ކުރިއެރުމެއް ލިބޭނެ ކަމަށް ބެލެވެއެވެ.