ނ. އަތޮޅުގައި ޖީ.އެން.އެސް.އެސް އަދި ސީ.އޯ.އާރް.އެސް ސަރވޭކުރުމުގެ ނިޒާމް ޤާއިމްކުރުން

ނ. އަތޮޅުގައި GNSS & CORS ސާވޭއިން ސިސްޓަމެއް ގާއިމުކުރުމަށްޓަކައި ވޯޓަރ ސޮލިއުޝަންސް ޕްރައިވެޓް ލިމިޓެޑާއެކު ތާރީޚީ އެއްބަސްވުމެއްގައި ސޮއިކުރިކަން އިއުލާނުކުރުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެކެވެ. މިއީ ކުރިއަރާފައިވާ ޓެކްނޮލޮޖީގެ އެހީގައި އަޅުގަނޑުމެންގެ މުޖުތަމައު ބާރުވެރިކުރުވުމަށާއި، ގުދުރަތީ ވަސީލަތްތައް ބެލެހެއްޓުން ހަރުދަނާކުރުމަށާއި، ބިން ބޭނުންކުރުމާއި، އިންފްރާސްޓްރަކްޗަރ ތަރައްގީކުރުމުގެ އިތުރުން ތިމާވެށީގެ ރޭވުންތެރިކަން ހަރުދަނާކުރުމަށް އެޅުނު މުހިންމު ފިޔަވަޅެކެވެ.

އަޅުގަނޑުމެންގެ ރަށްތަކުގެ ބަލަދުވެރިންގެ ހައިސިއްޔަތުން، އަންނަން އޮތް ޖީލުތަކަށްޓަކައި އަޅުގަނޑުމެންގެ ގުދުރަތީ ވަސީލަތްތައް—އެބަހީ ބިމާއި، ކަނޑުގެ ދިރުންތަކާއި، ތަފާތު ދިރުންތަކުން މުއްސަނދިވެފައިވާ ނިޒާމުތައް—ރައްކާތެރިކުރުމަކީ އަޅުގަނޑުމެން އެންމެންގެ ބޮޑު މަސްއޫލިއްޔަތެކެވެ. GNSS & CORS ސިސްޓަމަކީ މޫސުމަށް އަންނަ ބަދަލުތަކާއި، ކަނޑުގެ ލެވެލް އުފުލުމާއި، ތިމާވެށީގެ ގޮންޖެހުންތަކާ ކުރިމަތިލާއިރު، ހެކީގެ މައްޗަށް ބިނާކޮށް މި ވަސީލަތްތައް ހިމާޔަތްކުރުމަށް ކުރެވޭ މަސައްކަތްތަކަށް ލިބޭ މުހިންމު އެހީތެރިއެކެވެ.

މަޝްރޫއުގެ މުހިންމު ހަރަކާތްތައް

• ކޮންޓިނިއުއަސްލީ އޮޕަރޭޓިންގ ރިފަރެންސް ސްޓޭޝަން (CORS) އެއް ގާއިމުކުރުން: ކައުންސިލް އިދާރާގައި ގާއިމުކުރެވޭ މި ސްޓޭޝަން މެދުވެރިކޮށް، ތިމާވެށި ހިމާޔަތްކުރުމާއި ޕްލޭންކުރުމުގެ ނިންމުންތައް ނިންމުމަށް ބޭނުންވާ ވަގުތުން ވަގުތަށް ލިބޭ، އެންމެ ސައްހަ ޖީ.ޕީ.އެސް މައުލޫމާތު ފޯރުކޮށްދޭނެއެވެ.

  • GNSS ބޭސް އަދި ރޯވަރ ރިސީވަރުތައް ބޭނުންކުރުން: މަނަދޫން ފެށިގެން 25 ކިލޯމީޓަރަށްވުރެ ފުޅާ ދާއިރާއެއްގައި މަސައްކަތްކުރުމުގެ ގާބިލުކަން ލިބިގެންދާނެއެވެ. މީގެ ސަބަބުން ވަސީލަތްތައް ޗާޓުކުރުމާއި ތިމާވެށީގެ އެސެސްމަންޓްތައް ފުރިހަމައަށް ހެދުމަށް މަގުފަހިވާނެއެވެ.

  • GIS ނިޒާމުތަކާ ގުޅާލުން: މަގުތަކާއި، ޔުޓިލިޓީޒް، ޒޯނިންގ އަދި ހިމާޔަތްކޮށްފައިވާ ސަރަހައްދުތައް ސްމާޓް އަދި ދެމެހެއްޓެނިވި ގޮތެއްގައި ޕްލޭންކުރުމަށް މަގުފަހިކޮށްދީ، ތިމާވެއްޓާ ރައްޓެހި ތަރައްގީއަށް އެހީތެރިވެދޭނެއެވެ.

  • އަތުން ހިފައިގެން އުޅެވޭ ޖީ.ޕީ.އެސް ޑިވައިސްތައް ފޯރުކޮށްދިނުން: ރަށު ކައުންސިލްތަކާއި ޓެކްނިކަލް ޓީމުތަކުން ރަށުގެ ގޮނޑުދޮށަށް އަންނަ ބަދަލުތަކާއި، ބިން ބޭނުންކުރާ ގޮތާއި، ދިރުންތަކުގެ ދުޅަހެޔޮކަން މޮނިޓަރ ކުރުމަށް ކުރާ ސާވޭތަކަށް ބާރުވެރިކަން ލިބިގެންދާނެއެވެ.

  • ފުރިހަމަ ތަމްރީނު ޕްރޮގްރާމްތައް: ސިސްޓަމް ހިންގުމާއި، GIS މަސައްކަތްތަކާއި، މޫސުމީ ނުރައްކާތައް ދެނެގަތުމާއި، ތިމާވެށި މޮނިޓަރ ކުރުމުގެ ހުނަރުތައް ކައުންސިލްގެ މުވައްޒަފުންނަށް ދަސްކޮށްދެވޭނެއެވެ.

  • 10 އަހަރުގެ މެއިންޓެނަންސް އަދި ސަޕޯޓް ސަރވިސް: ދިގު މުއްދަތަކަށް ސިސްޓަމް އިތުބާރާއެކު ހިންގުމާއި، މޫސުމަށް އަންނަ ބަދަލުތަކަށް ހޭނުމަށް ކުރެވޭ މަސައްކަތްތަކަށް މެދުނުކެނޑި އެހީތެރިކަން ކަށަވަރުކޮށްދޭނެއެވެ.

  މިއީ އަޅުގަނޑުމެންގެ މުޖުތަމައަށް މުހިންމުވަނީ ކީއްވެ؟

  • ގުދުރަތީ ވަސީލަތްތައް ހިމާޔަތްކުރުން: ސައްހަ މައުލޫމާތާއެކު ޗާޓުކުރުމާއި މޮނިޓަރ ކުރުމުގެ ގާބިލުކަން ލިބުމުން، މުހިންމު ދިރުންތައް ހިމާޔަތްކުރުމަށާއި، އަތޮޅުގެ ވަސީލަތްތައް ބެލެހެއްޓުމަށާއި، ދެމެހެއްޓެނިވި ގޮތެއްގައި ބިން ބޭނުންކުރުމަށް އެހީތެރިވެދޭނެއެވެ. މީގެ ސަބަބުން އަޅުގަނޑުމެންގެ ނާޒުކު ތިމާވެށި ހަލާކުވުމުން ރައްކާތެރިކޮށްދޭނެއެވެ.

    • މޫސުމަށް އަންނަ ބަދަލުތަކަށް ހޭނުން: އިތުރަށް ފުރިހަމަވާ މައުލޫމާތުގެ އެހީގައި ގޮނޑުދޮށަށް އަންނަ ބަދަލުތައް ބަލައި، ފެންބޮޑުވުމުގެ ނުރައްކާ ދެނެގަނެ، ކަނޑުގެ ލެވެލް އުފުލުމާ ދެކޮޅަށް ރައްކާތެރިކަމުގެ ފިޔަވަޅުތައް އެޅުމަށް މަގުފަހިވާނެއެވެ. މިއީ ނުރައްކަލަށް ހުށަހެޅިފައިވާ މުޖުތަމައުތަކަށް ލިބޭނެ ބޮޑު އެހީއެކެވެ.

    • ,

      ބިން ބޭނުންކުރުމުގެ ރަނގަޅު ޕްލޭނިންގ: ސަރަޙައްދުތަކުގެ ސަރަޙައްދީ ސަރވޭކުރުން، އިންސާފުވެރި ގޮތެއްގައި ބިން ބެހުން، އަދި ގެދޮރު، ދަނޑުވެރިކަން، އިންފްރާސްޓްރަކްޗަރ އަދި ތިމާވެށި ރައްކާތެރިކުރުމަށް އިކޮލޮޖިކަލް ގޮތުން ބެލެންސްވާ ގޮތަށް ސަރަޙައްދުތައް ކަނޑައެޅުން.

    • އަވަސް އަދި ސައްޙަ ސަރވޭތައް: ސަރުކާރާއި އަމިއްލަ ފަރާތްތަކުގެ މަޝްރޫޢުތަކަށް ދިމާވާ ލަސްވުންތަކާއި ޚަރަދުތައް މަދުކުރުން، އަދި ތިމާވެށީގެ ކަންކަމަށް އަވަހަށް އިޖާބަދިނުން.

    • މޫސުމީ ބަދަލުތަކަށް ތައްޔާރުވުން: ތިމާވެށީގެ ޙާލަތު ބެލުމާއި އެކަންކަމަށް އިޖާބަދިނުމުގެ ޤާބިލުކަން އިތުރުކުރުން، ގުދުރަތާ އެއްގޮތްވާ ގޮތުގެމަތިން ދެމެހެއްޓެނިވި ތަރައްޤީ ގެނައުން.

    • ޑޭޓާއަށް ބިނާކޮށް ނިންމުންތައް ނިންމުން: ކައުންސިލްތަކާއި، ޑިވެލޮޕަރުންނާއި، މުޖުތަމަޢުގެ ޖަމްޢިއްޔާތަކަށް ހާމަކަން ބޮޑު އަދި އެންމެން ހިމެނޭ ގޮތަށް ވެރިކަން ހިންގުމަށް ރިއަލްޓައިމް ސްޕޭޝަލް ޑޭޓާއިން އެހީތެރިވުން.

    • ރަށުގެ އިޤްތިޞާދު ކުރިއެރުވުން: ދެމެހެއްޓެނިވި އިންވެސްޓްމަންޓްތައް ހިތްވަރުދިނުން، ކުދި ވިޔަފާރިތަކަށް އެހީތެރިވުން، އަދި ތިމާވެއްޓާ ރައްޓެހި މަޝްރޫޢުތަކުގެ މުއްދަތު އަވަސްކުރުން.

    • ޒުވާނުން ބާރުވެރިކުރުވުން: ޖީ.އައި.އެސް، ޒަމާނީ މެޕިންގ ޓެކްނޮލޮޖީ، އަދި ތިމާވެށި ރައްކާތެރިކުރުމުގެ ގޮތްތަކުގައި ރަށުގެ ޤާބިލުކަން އިތުރުކުރުން، ދެމެހެއްޓެނިވި ތަރައްޤީގައި ކުރިއަށް އޮތް ޖީލުގެ ލީޑަރުން ބާރުވެރިކުރުވުން.