ނ. އަތޮޅު ޤުރުއާން މުބާރާތް 2025 ވެލިދޫގައި ފާހަގަކޮށްލެވޭ ދަރިވަރުންގެ ބައިވެރިވުމާއެކު ނިމުމަކަށް

ނޫނު އަތޮޅު ކައުންސިލުން އިންތިޒާމުކޮށްގެން ނޫނު އަތޮޅު ވެލިދޫގައި ބޭއްވި "ނޫނު އަތޮޅު ގުރުއާން ފެސްޓިވަލް 2025" ފޯރިގަދަ މުބާރާތްތަކަކަށްފަހު އޮގަސްޓް 23 ވާ ހޮނިހިރު ދުވަހު ނިމިއްޖެއެވެ. އޮގަސްޓް 21 އިން 23 އަށް ކުރިއަށްދިޔަ މި ފެސްޓިވަލަކީ މުޅި އަތޮޅުގެ ދަރިވަރުން ގުރުއާން އުނގެނުމާއި ކިޔެވުމުގެ ހުނަރު ތަރައްގީކުރުމަށް އެއްތަންވި ހަރަކާތެކެވެ.

ކުރިން "އަތޮޅު ގުރުއާން މުބާރާތް" ގެ ނަމުގައި ބާއްވަމުން އައި މި ހަރަކާތް، "ނޫނު އަތޮޅު ގުރުއާން ފެސްޓިވަލް" ގެ ނަމަށް ބަދަލުކުރީ މިދިޔަ އަހަރުއެވެ. މިއީ މި ނަމުގައި ބޭއްވުނު ދެވަނަ ފެސްޓިވަލެވެ. މި ފެސްޓިވަލްގެ މައިގަނޑު މަގުސަދުތަކުގެ ތެރޭގައި ދަރިވަރުންގެ ހިތްތަކުގައި ކީރިތި ގުރުއާނަށް ލޯބިޖެއްސުމާއި، ތަޖުވީދުގެ މަގުން ގުރުއާން ކިޔެވުމާއި ހިތުދަސްކުރުމަށް ހިތްވަރުދިނުމާއި، ގުރުއާން އުނގަންނައިދިނުން ކުރިއެރުވުމުގެ އިތުރުން ބައިނަލްއަގުވާމީ ފެންވަރުގައި ރާއްޖެ ތަމްސީލުކުރެވޭނެ ގާރީންނާއި ހާފިޒުން އުފެއްދުން ހިމެނެއެވެ.

މި އަހަރުގެ ފެސްޓިވަލުގައި ނޫނު އަތޮޅުގެ ހުރިހާ ސްކޫލަކުން ޖުމްލަ 181 ދަރިވަރުން ބައިވެރިވިއެވެ. މުބާރާތް ކުރިއަށްދިޔައީ ދެ ގޮފި ބަހާލައިގެންނެވެ. އެއީ ބަލައިގެން ކިޔެވުމުގެ ގޮފި (107 ބައިވެރިން) އަދި ނުބަލައި ކިޔެވުމުގެ ގޮފި (74 ބައިވެރިން) އެވެ. މި ހަރަކާތް ކުރިއަށް ގެންގޮސްފައިވަނީ "ނޫނު އަތޮޅު ގުރުއާން ފެސްޓިވަލްގެ ގަވާއިދު 2025" އާ އެއްގޮތްވާ ގޮތުގެ މަތިންނެވެ.

މުބާރާތުގެ ހުރިހާ ބައިވެރިންނަށް އަތޮޅު ކައުންސިލްގެ ފަރާތުން ބައިވެރިވިކަމުގެ ސެޓްފިކެޓް ދީފައިވެއެވެ. ކޮންމެ ކީ-ސްޓޭޖަކުން އެންމެ މޮޅު ތިން ދަރިވަރުންނަށް ޓްރޮފީއާއި، ސެޓްފިކެޓް އަދި އިނާމު ދީފައިވާއިރު، ދެ ގޮފިން މުޅި މުބާރާތުން އެއްވަނަ ހޯދި ދަރިވަރުންނަށް ވަނީ ފައިސާގެ އިނާމުވެސް ދީފައެވެ.

ވަނަވަނައަށް ދިޔަ ދަރިވަރުން

• ބަލައިގެން ކިޔެވުމުގެ ގޮފި (ކީ-ސްޓޭޖް 4):
  1 ވަނަ: ޝާއިމް ބިން އައްބާސް (މޭނާ ސްކޫލް) – 10,000 ރުފިޔާ
  2 ވަނަ: އަރުޝަމް ރަޝީދު (ހެނބަދޫ ސްކޫލް) – 5,000 ރުފިޔާ
  3 ވަނަ: އައިޝަތު ޔޫލީ ޝާއިރު (މޭނާ ސްކޫލް، ކީ-ސްޓޭޖް 2) – 3,000 ރުފިޔާ

  • ނުބަލައި ކިޔެވުމުގެ ގޮފި (ކީ-ސްޓޭޖް 3):
    1 ވަނަ: އައިޝަތު އާނުމް އަހުޝަމް (ނޫނު އަތޮޅު ތައުލީމީ މަރުކަޒު) – 10,000 ރުފިޔާ
    2 ވަނަ: އަމްރާ ބިންތި އަބްދުﷲ އާމިރު (މާފަރު ސްކޫލް) – 5,000 ރުފިޔާ
    3 ވަނަ: ސާރާ ބިންތި އަހުމަދު ލިސާމް (ކެނދިކުޅުދޫ ސްކޫލް، ކީ-ސްޓޭޖް 2) – 3,000 ރުފިޔާ

  މުބާރާތުގައި ބައިވެރިވި 13 ސްކޫލްގެ ތެރެއިން، މުޅި މުބާރާތުން އެންމެ މޮޅު ސްކޫލަކަށް ހޮވުނީ ހެނބަދޫ ސްކޫލެވެ. ދެވަނަ މާފަރު ސްކޫލަށް ލިބުނުއިރު، ތިންވަނަ ހޯދީ ހޮޅުދޫ މޭނާ ސްކޫލެވެ.

  ,

  ނ. އަތޮޅު ތަޢުލީމީ މަރުކަޒުގެ ރިހި މާލަމުގައި ބޭއްވުނު ނިންމުމުގެ ރަސްމިއްޔާތުގައި އިސްލާމިކް މިނިސްޓްރީގެ ސްޓޭޓް މިނިސްޓަރ އޮނަރަބަލް ޢަބްދުﷲ ސައުދާން ޝަރަފުވެރިކޮށްދެއްވިއެވެ. މި ރަސްމިއްޔާތުގައި ދަރިވަރުންނާއި، މުދައްރިސުންނާއި، ބެލެނިވެރިންނާއި، ރަށު ކައުންސިލްގެ އިސްވެރިންނާއި އަދި މުޖުތަމަޢުގެ ފަރާތުން ބައިވެރިވެ ވަޑައިގެން، ޤުރުއާން ތަޢުލީމާއި އިސްލާމީ އަގުތަކަށް މުޖުތަމަޢުން ދޭ އަހައްމިއްޔަތުކަން ހާމަކޮށްދެއްވިއެވެ.