މޯލްޑިވްސް ސްޕޭސް ރިސާރޗް އޯގަނައިޒޭޝަނާއެކު ސެޓެލައިޓް އިމޭޖަރީ އަދި ޕްލެޓްފޯމް ތަރައްޤީކުރުމުގެ އެއްބަސްވުމުގައި ސޮއިކުރުން

ނޫނު އަތޮޅުގެ ބިން ބެލެހެއްޓުމަށާއި ޖިއޮގްރަފިކް އިންފޮމޭޝަން ސިސްޓަމް (ޖީ.އައި.އެސް) އެކުލެވޭ ޕްލެޓްފޯމެއް ގާއިމުކުރުމަށާއި، މަތީ ފެންވަރުގެ ސެޓެލައިޓް ފޮޓޯ ހޯދުމަށް މޯލްޑިވްސް ސްޕޭސް ރިސާޗް އޯގަނައިޒޭޝަން (އެމް.އެސް.އާރު.އޯ) އާއެކު އަޅުގަނޑުމެން އެއްބަސްވުމެއްގައި ސޮއިކޮށްފީމެވެ. މިއީ ނޫނު އަތޮޅުގެ ދެމެހެއްޓެނިވި ތަރައްގީއަށާއި، އާބަން ޕްލޭނިންގް ހަރުދަނާކުރުމަށާއި، އަދި ގުދުރަތީ ވަސީލަތްތައް ރައްކާތެރިކުރުމަށް އަޅުގަނޑުމެން ކުރަމުންދާ މަސައްކަތަށް ލިބުނު މުހިންމު ކުރިއެރުމެކެވެ.

މި އެއްބަސްވުމުގެ ދަށުން ލިބޭ މަތީ ފެންވަރުގެ ސެޓެލައިޓް ފޮޓޯތަކުގެ އެހީގައި، ބިން ބެލެހެއްޓުމާއި، ވަސީލަތްތައް ބެހުމާއި، އަދި ތިމާވެށި މޮނިޓަރ ކުރުމުގައި އިތުރަށް ހަރުދަނާ އަދި ސްޓްރެޓީޖިކް ނިންމުންތައް ނިންމުމަށް މަގުފަހިވެގެންދާނެއެވެ. މިފަދަ ޒަމާނީ ޓެކްނޮލޮޖީ އަޅުގަނޑުމެންގެ ހިންގުމުގެ ނިޒާމުގެ ތެރެއަށް ތައާރަފުކުރުމުގެ މަގުސަދަކީ، ދެފުށް ފެންނަ އަދި ހަރުދަނާ ނިޒާމެއް ގާއިމުކުރުމާއެކު، އަޅުގަނޑުމެންގެ ސިޔާސަތުތަކަކީ ރައްޔިތުންގެ ބޭނުންތަކާއި އަތޮޅުގެ ނާޒުކު ތިމާވެށި ހިމާޔަތްކުރުމަށް އިސްކަންދޭ ސިޔާސަތުތަކަކަށް ހެދުމެވެ.

އިނޮވޭޝަން ޕްލެޓްފޯމެއް ބިނާކުރުން

މި ޕާޓްނަރޝިޕްގެ މައިގަނޑު އެއް މަގުސަދަކީ ނޫނު އަތޮޅުގެ ބޭނުންތަކަށް ހާއްސަކޮށްގެން ފަރުމާކުރެވިފައިވާ، ބިން ބެލެހެއްޓުމާއި ޖީ.އައި.އެސް ހިމެނޭ ވަރުގަދަ ޕްލެޓްފޯމެއް އުފެއްދުމެވެ. މި ޕްލެޓްފޯމުގެ ސަބަބުން ސީދާ އަދި ސައްހަ ސްޕޭޝަލް އެނަލިސިސް ހެދުމަށް މަގުފަހިވެ، ބިން ބޭނުންކުރާނެ ގޮތުގެ ޕްލޭންތައް އެކުލަވާލުމާއި ބަދަލުތައް މޮނިޓަރ ކުރުމަށް ބޭނުންވާ ވަސީލަތްތައް ލިބިގެންދާނެއެވެ. މީގެ އިތުރުން، ވަސީލަތްތައް ބެހުމާއި، ހަމަހަމަ ތަރައްގީ އަދި ތިމާވެށީގެ ގޮތުން ނާޒުކު ސަރަހައްދުތަކުގެ ރިސްކް މެނޭޖްމަންޓް ފަދަ ގޮންޖެހުންތަކަށް ހައްލު ހޯދުމަށް މި ޕްލެޓްފޯމުގެ ސަބަބުން އެހީތެރިވެދޭނެއެވެ.

މި ޕްލެޓްފޯމް މެދުވެރިކޮށް، ރަށު ކައުންސިލްތަކަށް އެންމެ ފަހުގެ ސައްހަ މައުލޫމާތު ފޯރުކޮށްދީ، ރައްޔިތުންނަށް ދޭ ހިދުމަތްތައް އިތުރަށް ފުރިހަމަކުރުމަށް އަޅުގަނޑުމެން އުންމީދުކުރަމެވެ. ހެކީގެ މައްޗަށް ބިނާވެފައިވާ ހިންގުމުގެ ނިޒާމެއް ގާއިމުކުރުމުން، ނިންމުންތައް ނިންމުމުގެ މަރުހަލާ ހަރުދަނާވެ، އަތޮޅުގެ ހުރިހާ ރަށަކަށް ފައިދާކުރާނެ ފަދަ ދެމެހެއްޓެނިވި ކުރިއެރުމަކަށް ބިންގާ އެޅިގެންދާނެއެވެ.

ގުދުރަތީ ވަސީލަތްތައް ހިމާޔަތްކުރުން

ގުދުރަތީ ވަސީލަތްތައް ހިމާޔަތްކުރުމަކީ މި މަސައްކަތުގެ އެންމެ އިސް އެއް އަމާޒެވެ. ތަރައްގީކުރެވޭ ސެޓެލައިޓް އިމޭޖަރީ އަދި ޖީ.އައި.އެސްގެ އެހީގައި ދިރުންތަކުގެ މުއްސަނދިކަން ބަލައި، ގޮނޑުދޮށްތަކަށް އަންނަ ބަދަލުތައް ދެނެގަނެ، ފެނުގެ ވަސީލަތްތައް އިތުރަށް ހަރުދަނާކޮށް ބެލެހެއްޓޭނެއެވެ. މި ވަސީލަތްތަކުގެ އެހީގައި ތިމާވެއްޓަށް އަންނަ ބަދަލުތައް ކުރިއާލާ ދެނެގަނެވި، ދިރޭތަކެތީގެ މާހައުލު ގެއްލުމާއި، ރަށް ގިރުމާއި، އަދި ކަނޑުގެ ދިރުންތަކަށް އަންނަ ބަދަލުތަކަށް ފިޔަވަޅު އެޅުމަށް މަގުފަހިވާނެއެވެ.

މި އެއްބަސްވުމަކީ ތަރައްގީއާއި ތިމާވެށި ހިމާޔަތްކުރުމުގެ މެދުގައި ހަމަހަމަކަން ގާއިމުކުރުމަށް އަޅުގަނޑުމެން ކުރާ އިތުބާރު ބޮޑު މަސައްކަތެކެވެ. މި ޕްލެޓްފޯމުން ލިބޭ މައުލޫމާތުގެ އެހީގައި، ތިމާވެއްޓާއި ސަގާފަތަށް އިހުތިރާމްކުރާ ފަދަ ތަރައްގީގެ މަޝްރޫއުތައް ދެނެގަނެވި، ހުރިހާ ކުރިއެރުމަކީވެސް އަޅުގަނޑުމެން ގަބޫލުކުރާ ދެމެހެއްޓެނިވި އަދި ތަހައްމަލުކުރެވިދާނެ އުސޫލުތަކާ އެއްގޮތަށް ކުރިއަށްދާ ކަންކަންކަން ކަށަވަރުކުރެވޭނެއެވެ.

މި ޕާޓްނަރޝިޕްގެ ފައިދާތައް

• ލާމެހިފައިވާ ބިން ބެލެހެއްޓުމުގެ ނިޒާމެއް

  ,

  އެއްވިއުގައަކުން ގުޅާލެވިފައިވާ ޖީ.އައި.އެސް ޕްލެޓްފޯމެއްގެ ސަބަބުން ބިން ބޭނުންކުރާ ގޮތް މޮނިޓަރކޮށް ކޯޑިނޭޓްކުރުމަށް މަގުފަހިވެ، ހަމަހަމަކަމާއެކު ބިން ބޭނުންކުރުމަށާއި ދެމެހެއްޓެނިވި ގޮތެއްގައި ވަސީލަތްތައް ބެހުމަށް ބާރުލިބޭނެއެވެ.

  • ތިމާވެށި ބެލެހެއްޓުން ހަރުދަނާވުން

    ސެޓެލައިޓް މެދުވެރިކޮށް ލިބޭ މަތީ ފެންވަރުގެ ތަފްސީލީ މައުލޫމާތުގެ އެހީގައި، ތިމާވެށީގެ ދިރާސާތައް ފުރިހަމައަށް ކުރިއަށް ގެންގޮސް، ހާއްސަ ސަމާލުކަމެއް ދީގެން ތިމާވެށި ހިމާޔަތްކުރުމުގެ އިސްތިރާތީޖީތައް އެކުލަވާލުމަށް މަގުފަހިވާނެއެވެ.

    • ރަށްވެހިކަމާއި އިންފްރާސްޓްރަކްޗަރ ޕްލޭންކުރުން ހަރުދަނާވުން

      ސްޕޭޝަލް އެނަލިސިސް ނުވަތަ ތަންތަނުގެ ޖާގައާއި އިންތަކަށް ބަލައި ކުރެވޭ ދިރާސާތަކުގެ އެހީގައި، ހަރުދަނާކަމާއެކު ރޭވިފައިވާ އަދި މުޖުތަމައުގެ ދިގު މުއްދަތުގެ ލަނޑުދަނޑިތަކާ އެއްގޮތްވާނޭހެން އިންފްރާސްޓްރަކްޗަރ މަޝްރޫއުތައް ކުރިއަށް ގެންދިއުމަށް ބާރުލިބޭނެއެވެ.

      • ކާރިސާތަކަށް ތައްޔާރުވުމުގެ ގާބިލުކަން އިތުރުވުން

        ޖިއޯސްޕޭޝަލް ޓެކްނޮލޮޖީގެ ސަބަބުން ނުރައްކާތައް ދެނެގަތުމާއި ކާރިސާތައް މެނޭޖްކުރުމުގެ ގާބިލުކަން އިތުރުވެ، ރައްޔިތުންގެ ރައްކާތެރިކަމާއި ދުޅަހެޔޮކަން ކަށަވަރުކުރެވޭނެއެވެ.

        ވިލުންތެރިކަމަށްޓަކައި އެކުގައި އެޅޭ ފިޔަވަޅެއް

        އެމް.އެސް.އާރު.އޯ އާއެކު ވެވުނު މި ބައިވެރިވުމަކީ އައު އީޖާދުތަކާއި ގުޅިގެން މަސައްކަތްކުރުމުގެ ތެރެއިން ވެރިކަން ހިންގުމުގެ ނިޒާމު ޒަމާނީ ކުރުމަށް އަޅުގަނޑުމެން ކުރާ މަސައްކަތުގެ ހެއްކެކެވެ. އެންމެ ފަހުގެ ސްޕޭޝަލް ރިސާޗާއި ޓެކްނޮލޮޖީ ބޭނުންކޮށްގެން، އަޅުގަނޑުމެން މަސައްކަތް ކުރަމުންދަނީ މިހާރު ކުރިމަތިވެފައިވާ އަދި ކުރިމަތިވެދާނެ ގޮންޖެހުންތަކަށް ފުރިހަމަ ހައްލެއް ހޯދުމަށެވެ. މި މަސައްކަތުގެ ފައިދާ ހަމައެކަނި އިދާރާއަށް ނޫން، ނޫނު އަތޮޅުގެ ހުރިހާ ރައްޔިތުންނަށް ކުރާނެއެވެ. އަދި މިއީ ވިލުންތެރި އަދި އެންމެން ބައިވެރިވާ މުސްތަގުބަލެއް ބިނާކުރުމަށް ކުރެވޭ މަސައްކަތެކެވެ.

        ކުރިއަށް އޮތް ތަން

        މި ނިޒާމު އަމަލީ ގޮތުން ބޭނުންކުރަން ފެށުމަށް ހަމަޖެހިފައިވަނީ ކުރިއަށް އޮތް މަސްތަކުގެ ތެރޭގައެވެ. އަޅުގަނޑުމެންގެ އަމާޒަކީ މި މަސައްކަތުގެ ފައިދާ ނޫނު އަތޮޅުގެ ކޮންމެ ކަނަކަށްވެސް ފޯރުކޮށްދިނުމެވެ. މިއީ ހަމައެކަނި ޓެކްނޮލޮޖީގެ ގޮތުން ގެނެވޭ ކުރިއެރުމެއް ނޫނެވެ. މިއީ ތިމާވެއްޓާ ރައްޓެހި، ޒިންމާދާރު އަދި ދުރުވިސްނޭ ވެރިކަމެއް ގާއިމުކުރުމަށް ވެވޭ އިގުރާރެކެވެ.