އެޗް.އީ އެރިކް ވޯލްޝް މަނަދޫ ކައުންސިލާއެކު ތަރައްޤީގެ މަޝްރޫޢުތަކާއި ކުނި މެނޭޖްކުރުމާ ބެހޭގޮތުން މަޝްވަރާކުރައްވައިފި

ކެނެޑާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު، ހިޒް އެކްސެލެންސީ އެރިކް ވޮލްޝް، މަނަދޫ ކައުންސިލާ ބައްދަލުކުރައްވައިފިއެވެ. މި ބައްދަލުވުމުގައި މަނަދޫ ކައުންސިލުން ވަނީ އެ ރަށުގައި ކުރިއަށްދާ މަޝްރޫއުތަކާއި، ކުރިމަގުގެ ރޭވުންތަކުގެ އިތުރުން، މިހާރު މުޖުތަމައަށް ކުރިމަތިވެފައިވާ ގޮންޖެހުންތަކާ ބެހޭ މައުލޫމާތު ހިއްސާކޮށްފައެވެ. މި ބައްދަލުވުމަކީ ކަންބޮޑުވުން ހުރި މުހިންމު ދާއިރާތަކާ ގުޅޭގޮތުން މަޝްވަރާކުރުމަށް ލިބުނު ފުރުސަތެކެވެ. މިގޮތުން، ރަށުގެ ކުނި މެނޭޖުކުރުމުގެ ކަންކަމަށް ހާއްސަ ސަމާލުކަމެއް ދެވުނެވެ.

ކުނި މެނޭޖުކުރުމުގައި ހުރި ގޮންޖެހުންތައް

ބައްދަލުވުމުގެ ތެރެއިން، މަނަދޫ ކައުންސިލުން ވަނީ އެ ރަށުގެ މަޝްރޫއުތަކުގެ ހުލާސާއެއް ހުށަހަޅައި، ކުނި ނައްތާލުމުގައި ކުރިމަތިވާ ނާޒުކު މައްސަލަތައް ފާހަގަކޮށްފައެވެ. އެގޮތުން، އަމަލީ ގޮތުން ކުރެވެން ހުރި އެހެން ގޮތްތަކެއް ނެތުމުގެ ސަބަބުން، މިހާރު ކައުންސިލުން ކުނި ނައްތާލަމުން ދަނީ ކަނޑަށް އުކާލައިގެންކަން ފާހަގަކުރިއެވެ. މިއީ އެންމެ ރަނގަޅު ހައްލެއް ނޫންކަން ގަބޫލުކުރާ ހާލު، ދެމެހެއްޓެނިވި ގޮތެއްގައި ކުނި މެނޭޖުކުރެވޭނެ ނިޒާމެއް ގާއިމުކުރެވެންދެން، މިއީ މިވަގުތަށް އޮތް ހަމައެކަނި ގޮތްކަން ކައުންސިލުން ފާހަގަކުރިއެވެ.

މަޝްވަރާތަކަށްފަހު، ހައިކޮމިޝަނަރު އެރިކް ވޮލްޝް ވަނީ ރަށުގެ އެކި މަޝްރޫއުތައް ހިނގާ ސަރަހައްދުތަކަށް ޒިޔާރަތްކުރައްވާފައެވެ. މީގެ ތެރޭގައި މަނަދޫ ކުނި މެނޭޖުކުރާ މަރުކަޒު ހިމެނެއެވެ. މަނަދޫ ކައުންސިލާއެކު ބޭއްވުނު މި ބައްދަލުވުމުން ދޭހަކޮށްދެނީ، މަޝްވަރާ އާއި ގުޅިގެން މަސައްކަތްކުރުމުގެ ތެރެއިން ރަށު ފެންވަރުގައި ހުރި މައްސަލަތަކަށް ހައްލު ހޯދުމުގެ މުހިންމުކަމެވެ. މި ޒިޔާރަތުގެ ސަބަބުން، ގޮންޖެހުންތައް އަމަލީ ގޮތުން ބަލައި، ރަށުގެ ބޭނުންތަކާއި އިސްކަންދޭ ކަންކަމާ އެއްގޮތްވާނޭ ފަދަ އަމަލީ ހައްލުތަކެއް ހޯދުމަށް ދެވޭ އަހައްމިއްޔަތު ހާމަވެގެންދެއެވެ.

މި މަޝްވަރާތަކާއި ސައިޓް ޒިޔާރަތްތަކަކީ، މަނަދޫގެ ތަރައްގީއަށާއި ރައްޔިތުންގެ ލާބައަށްޓަކައި، ކުނި މެނޭޖުކުރުމުގައި އަމަލީ ގޮތުން ކުރެވިދާނެ ދެމެހެއްޓެނިވި ގޮތްތައް ދެނެގަތުމަށް އެޅުނު ފިޔަވަޅެކެވެ.