ލާމަރުކަޒީ ނިޒާމާއި، އެކުލެވޭ މުޖުތަމައެއް އަދި މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލްކަން އިތުރުކުރުމާ ބެހޭ ޕެނަލް މަޝްވަރާ

9 އިން 10 ޑިސެމްބަރު 2024 އަށް ކުރިއަށްދިޔަ އެންޓި-ކޮރަޕްޝަން ކޮންފަރެންސްގެ ތެރެއިން، ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން ބޭއްވި މުހިންމު ޕެނަލް ޑިސްކަޝަނެއްގައި، ނޫނު އަތޮޅު ކައުންސިލާއި އެހެނިހެން ބައިވެރިން ފާހަގަކުރި ގަވަރނަންސް ނުވަތަ ހިންގުމުގެ ނިޒާމުގައި ހުރި މުހިންމު ގޮންޖެހުންތަކަށް އަލިއަޅުވާލައިފިއެވެ. މި މަޝްވަރާއަކީ ޒުވާނުންނާއި ނުކުޅެދުންތެރިކަން ހުންނަ ފަރާތްތަކުގެ އިސްލީޑަރުންނަށް މި މައްސަލަތައް ވަޒަންކޮށް، އެންމެންގެ ބައިވެރިވުން އިތުރުކުރުމަށާއި، ހިންގުން ހަރުދަނާކުރުމަށާއި، އަދި މޫސުމީ ބަދަލުތަކަށް ކެތްތެރިކަން އިތުރުކުރުމަށް ކުރެވިދާނެ ކަންކަމާ ގުޅޭގޮތުން ޚިޔާލު ބަދަލުކުރުމަށް ލިބުނު މުހިންމު ފުރުސަތެކެވެ.

ފާހަގަކުރެވުނު ގޮންޖެހުންތައް

ލޯކަލް ގަވަރނަންސް ނިޒާމުގެ ތެރެއިން ކުރިއެރުން ހޯދުމަށް ހުރި ބައެއް ބޮޑެތި ގޮންޖެހުންތައް ނޫނު އަތޮޅު ކައުންސިލުން ވަނީ ފާހަގަކޮށްފައެވެ. މީގެ ތެރޭގައި މަރުކަޒީކޮށް ގޮތް ނިންމުމުގެ ސަބަބުން ކުރިމަތިވާ މާލީ ދަތިތައް ހިމެނެއެވެ. މިގޮތަށް ކަންކަން މަރުކަޒީވެފައި އޮތުމުގެ ސަބަބުން، ރަށު ފެންވަރުގައި މުޖުތަމައަށް ބޭނުންވާ ކަންކަމަށް އިސްކަންދީގެން ވަސީލަތްތައް މެނޭޖުކުރުމަށް ކައުންސިލަށް ބޮޑެތި ހުރަސްތަކެއް ކުރިމަތިވެއެވެ. މީގެ އިތުރުން، އަންހެނުންނާއި، ޒުވާނުން އަދި ނުކުޅެދުންތެރިކަން ހުންނަ ފަރާތްތައް ފަދަ މުޖުތަމައުގެ ބައެއް ގްރޫޕްތަކަށް ހިންގުމުގެ ދާއިރާގައި ތަމްސީލުވުމަށް ބޮޑެތި ހުރަސްތަކެއް ހުރުމުން، މުހިންމު ނިންމުންތައް ނިންމުމުގައި އެފަރާތްތަކުގެ އަޑު ނީވޭކަން ފާހަގަކުރެވުނެވެ.

މުޖުތަމައުގެ ބައިވެރިވުން އިތުރުކުރުމަކީ ވެސް އަވަސް އިސްލާހީ ފިޔަވަޅުތަކެއް ބޭނުންވާ ދާއިރާއެއްގެ ގޮތުގައި ފާހަގަކުރެވުނެވެ. މިހާރު އޮތް ހިންގުމުގެ ނިޒާމުތަކުގައި އާންމުންގެ ފުޅާ ބައިވެރިވުމަށް މަގުފަހިކޮށްދޭނެ ހަރުދަނާ ގޮތްތަކެއް ނެތުމުގެ ސަބަބުން، އިތުބާރު ކުޑަވެ، ނިންމުންތައް ނިންމާ ފަރާތްތަކާއި އާންމުންނާ ދެމެދު އޮންނަ ގުޅުން ދަނީ ކުޑަވަމުންނެވެ. އަދި ސަރުކާރު ޖަވާބުދާރީ ކުރުވުމަށް ހުރި ނިޒާމުތަކާ ބެހޭގޮތުންނާއި، މޫސުމީ ބަދަލުތަކަށް ހޭނުމުގެ މުހިންމުކަމާ ގުޅޭގޮތުން ގިނަ ރައްޔިތުންނަށް އެކަށީގެންވާ މައުލޫމާތު ލިބިފައި ނެތުމަކީ، މި ދާއިރާތަކުގައި އާންމުންގެ މާނަހުރި ބައިވެރިވުމަށް އޮތް އިތުރު ހުރަހެކެވެ.

އިސްލާހަށް ހުށަހެޅުނު ކަންކަން

ހިންގުމުގެ ނިޒާމުގައި ހުރި މި ގޮންޖެހުންތަކަށް ހައްލު ހޯދުމަށާއި މުޖުތަމައުގެ ކެތްތެރިކަން އިތުރުކުރުމަށް ކުރެވިދާނެ ކަންކަމާ ގުޅޭގޮތުން ޕެނަލިސްޓުން މަޝްވަރާ ކުރެއްވިއެވެ. މީގެ ތެރެއިން އެންމެ މުހިންމު ހައްލެއްގެ ގޮތުގައި ފާހަގަކުރެވުނީ ލާމަރުކަޒީ ހިންގުން ހަރުދަނާކޮށް، މާލީ ވަސީލަތްތަކާއި ގޮތް ނިންމުމުގައި ރަށު ކައުންސިލްތަކަށް މިހާރަށްވުރެ ބޮޑު އިޚްތިޔާރެއް ދިނުމެވެ. މިއީ ވަސީލަތްތައް އެންމެ އެދެވޭ ގޮތުގައި ބޭނުންކުރުމަށާއި މުޖުތަމައުގެ ބޭނުންތަކަށް އަމާޒުކޮށްގެން ކަންކަން ކުރުމަށް އޮތް އެންމެ މުހިންމު މަގުކަމުގައި ބެލެވުނެވެ.

ނާޒުކު ހާލަތްތަކުގައި ތިބޭ ފަރާތްތަކުގެ ބައިވެރިވުން އިތުރުކުރުމަކީ ވެސް އިސްލާހީ ބަދަލުތަކުގެ މުހިންމު ބައެއްގެ ގޮތުގައި ފާހަގަކުރެވުނެވެ. ނިންމުންތައް ނިންމާ ފެންވަރުގައި މިފަދަ ފަރާތްތަކުގެ ތަމްސީލުވުން ކަށަވަރުކުރުމަށްޓަކައި ސާފު މެންޑޭޓްތަކެއް ނުވަތަ އުސޫލުތަކެއް އޮތުމުގެ މުހިންމުކަމަށް ޕެނަލިސްޓުން ބާރުއެޅުއްވިއެވެ. އަދި އަވަށްޓެރި ސަރަހައްދުތަކުގައި މިފަދަ ބައިވެރިވުން ހިމެނޭ ކައުންސިލްތަކުން ވަޒީފާ ނެތް މީހުންގެ މައްސަލަތަކާއި ތައުލީމީ ދާއިރާގެ މައްސަލަތައް ކާމިޔާބުކަމާއެކު ހައްލުކޮށްފައިވާ ނަމޫނާތައް ހިއްސާކޮށް، މިފަދަ ތަމްސީލުވުމުގެ ސަބަބުން ކުރާ ހެޔޮ އަސަރުތައް ދައްކުވައިދިނެވެ.

,

ވެރިކަންކުރާ އިދާރާތަކާއި އާންމު ރައްޔިތުންނާ ދެމެދު އޮތް ފަރަގު ކުޑަކުރުމަށްޓަކައި، އާންމުންގެ މަޝްވަރާ ހޯދުމުގެ ފުރުސަތުތައް އިތުރުކުރުމަށާއި އެކަން މިހާރަށްވުރެ ހަރުދަނާކުރުމަށް ބާރުއެޅުނެވެ. މިގޮތުން ބާއްވާ މަޝްވަރާތަކަކީ، ރަށު ފެންވަރުގެ ބައްދަލުވުންތަކާއި ޑިޖިޓަލް ވަސީލަތްތަކުގެ އެހީގައި، ދެފަރާތުގެ މެދުގައި އިތުބާރު ގާއިމުކޮށް، ރައްޔިތުންގެ ބޭނުންތައް ވެރިކަންކުރުމުގެ ނިޒާމުގެ ތެރެއިން ފުއްދައިދިނުމަށް މަގުފަހިކޮށްދޭނެ ކަމެއްގެ ގޮތުގައި ފާހަގަކުރެވުނެވެ.

މީގެ އިތުރުން، ވަކި އަމާޒުތަކެއް ކަނޑައަޅައިގެން ހޭލުންތެރިކަން އިތުރުކުރުމުގެ މުހިންމުކަމުގެ މައްޗަށް އަލިއަޅުވާލެވުނެވެ. ވެރިކަންކުރުމުގެ ނިޒާމުގައި ހުންނަ ވަސީލަތްތަކާއި، ޖަވާބުދާރީކުރުވުމުގެ އުސޫލުތަކާއި، އަދި މޫސުމީ ބަދަލުތަކާ ގުޅޭގޮތުން އެޅޭ ފިޔަވަޅުތަކާ ބެހޭ މައުލޫމާތު ރައްޔިތުންނަށް ފޯރުކޮށްދީ ބާރުވެރިކުރުވުމަކީ، ހޭލުންތެރި އަދި އިސްނަގައިގެން މަސައްކަތްކުރާ މުޖުތަމައެއް ބިނާކުރުމަށް ކޮންމެހެން ބޭނުންތެރި ކަމެކެވެ. މި މަގްސަދު ހާސިލުކުރުމަށްޓަކައި އަމަލީ ގޮތުން ކުރެވިދާނެ ކަންތައްތަކުގެ ތެރޭގައި، މުޖުތަމައު އިސްނަގައިގެން ހިންގާ ހަރަކާތްތަކާއި ތައުލީމީ މަސައްކަތު ބައްދަލުވުންތައް ހިމެނުމަށް ލަފާދެވުނެވެ.