ކެނެޑާގެ ހައި ކޮމިޝަނަރު މާފަރު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރައްވައިފި

ކެނެޑާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު، ހިޒް އެކްސެލެންސީ އެރިކް ވޮލްޝް، ނޫނު އަތޮޅަށް ކުރެއްވި ދަތުރުފުޅުގައި މާފަރު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) އާ ބައްދަލުކުރައްވައިފިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ކައުންސިލާއި ޑަބްލިއު.ޑީ.ސީ އިން މިހާރު ކުރިއަށްގެންދާ މަޝްރޫޢުތަކާއި، ތަރައްޤީގެ ރޭވުންތަކުގެ އިތުރުން، ލަނޑުދަނޑިތައް ހާސިލުކުރުމުގައި ކުރިމަތިވާ ގޮންޖެހުންތަކާ ގުޅޭގޮތުންނެވެ.

ގޮންޖެހުންތަކަށް ހައްލު ހޯދުމާއި އިސްނެގުންތައް ހިއްސާކުރުން

މާފަރު ކައުންސިލާއި ޑަބްލިއު.ޑީ.ސީ އިން ވަނީ މުޖުތަމަޢުގެ ލާބައަށް ކުރަމުންދާ މަސައްކަތްތައް ހުށަހަޅާފައެވެ. މީގެ ތެރޭގައި މިހާރު ކުރިއަށްދާ އަދި ނިމިފައިވާ މަޝްރޫޢުތަކުގެ އިތުރުން، އާންމު ޚިދުމަތްތަކާއި އިންފްރާސްޓްރަކްޗަރ ރަނގަޅުކުރުމަށް ކުރިއަށް ރޭވިފައިވާ ކަންކަން ހިމެނެއެވެ. ނަމަވެސް، މާލީ ދަތިކަމާއި ވަސީލަތްތަކުގެ މަދުކަން ފަދަ ހުރަސްތައް އެ ފަރާތްތަކުން ފާހަގަކުރިއެވެ. މީގެ ތެރެއިން އެންމެ ބޮޑު އެއް މައްސަލައެއްގެ ގޮތުގައި ފާހަގަކުރީ، އެކަށީގެންވާ ކައުންސިލް އިދާރާއެއް ނެތުމުގެ ސަބަބުން އިދާރީ މަސައްކަތްތަކަށް ހުރަސްއެޅުމާއި، ބަޖެޓުގެ ދަތިކަމުގެ ސަބަބުން މަޝްރޫޢުތައް އެންމެ ފުރިހަމައަށް ހިންގުމަށް ކުރިމަތިވާ ހުރަސްތަކެވެ.

ދެމެހެއްޓެނިވި ތަރައްޤީއާ ގުޅޭގޮތުން ވެސް މި ބައްދަލުވުމުގައި ފުޅާދާއިރާއެއްގައި ވާހަކަދެކެވުނެވެ. ނޫނު އަތޮޅު ކައުންސިލާ ގުޅިގެން އެކުލަވާލާފައިވާ އިއާދަކުރަނިވި ހަކަތައިގެ މަޝްރޫޢުގެ ދަށުން، އިރުގެ ހަކަތައަށް ބަދަލުވުމަށް ކުރަމުންދާ މަސައްކަތްތައް ކައުންސިލުން ހިއްސާކުރިއެވެ. މި މަޝްރޫޢަށް ބިން ކަނޑައެޅިފައިވީ ނަމަވެސް، މަރުކަޒީ ސަރުކާރުގެ ނިންމުންތަކާ ގުޅިގެން މި މަސައްކަތް މިހާރު އޮތީ މަޑުޖެހިފައެވެ.

މީގެ އިތުރުން، ނޫނު އަތޮޅުގެ ކުނި މެނޭޖުކުރުމުގެ ޕްލޭނާ ގުޅޭގޮތުން ވެސް ކައުންސިލުން މަޢުލޫމާތު ދިނެވެ. މިއީ މީހުން ދިރިއުޅޭ ރަށްތަކާއި ރިސޯޓުތައް ގުޅުވާލައިގެން، ކުނި ނައްތާލުމުގެ ނިޒާމު ހަރުދަނާކޮށް، ތިމާވެއްޓާ ރައްޓެހި އުސޫލުތައް މުޖުތަމަޢުގައި ކުރިއެރުވުމަށް އެކުލަވާލާފައިވާ ޕްލޭނެކެވެ.

މި ބައްދަލުވުމުގައި ހައިކޮމިޝަނަރު އެރިކް ވޮލްޝް ވަނީ ފާހަގަކުރެވުނު ކަންބޮޑުވުންތަކަށް އަލިއަޅުއްވާލައްވައި، އެހީތެރިކަން ފޯރުކޮށްދެވިދާނެ ދާއިރާތަކާ ގުޅޭގޮތުން ވާހަކަދައްކަވާފައެވެ. އެގޮތުން، 6 ފެބްރުއަރީ 2025 ގެ ނިޔަލަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލެވިފައިވާ "ކެނެޑާ ފަންޑު" އާ ގުޅޭ މަޢުލޫމާތު އެމަނިކުފާނު ހިއްސާކުރެއްވިއެވެ. މިއީ ހަރަކާތްތެރި އެންޖީއޯތައް ހިމެނޭހެން އެކި ފަރާތްތަކަށް މާލީ އެހީތެރިކަން ފޯރުކޮށްދިނުމަށް ގާއިމުކޮށްފައިވާ ފަންޑެކެވެ. މި ފަންޑުގެ ބޭނުމަކީ މުޖުތަމަޢުގެ ތަރައްޤީގެ ލަނޑުދަނޑިތަކާ އެއްގޮތްވާ ގޮތުގެ މަތިން، ރަށު ފެންވަރުގައި ކުރިމަތިވާ ގޮންޖެހުންތަކަށް ހައްލު ހޯދައިދޭ މަޝްރޫޢުތަކަށް އެހީތެރިވުމެވެ.

ޝަރުތު ހަމަވާ ފަރާތްތަކުން ދެ ސަފުހާގެ ކުރު ޕްރޮޕޯސަލެއް ހުށަހެޅުމަށް ހައިކޮމިޝަނަރު ބާރުއެޅުއްވިއެވެ. އަދި ރަށު ފެންވަރުގައި ކުރެވޭ މަސައްކަތްތަކާ ގުޅިގެން، ދެމެހެއްޓެނިވި އަދި ނަތީޖާ ފެންނަ މަޝްރޫޢުތަކަށް އެހީތެރިވުމުގައި ކެނެޑާގެ އެއްބާރުލުން ލިބޭނެކަމުގެ ޔަގީންކަން އެމަނިކުފާނު ދެއްވިއެވެ.